Св. Петка

Манастир Св. Петка

Трајан и неговата сестра Цвета Калунџиевски во 1977 година сониле речиси ист сон: на фиљан место да изградат црква. Така и би, храмот "Св. Петка", во кој вложиле 50.000 евра, се изгради.

Во 1977 година, на Трајан Калунџиевски од Подмочани, во Виена на сон му се сонило веднаш да отиде во своето родно село и во месноста Лековита Вода, во подножјето на Баба Планина, само два километра од неговата родна куќа, да подигне светилиште. Речиси во исто време истиот сон го сонила и неговата сестра, Цвета, исто од Виена. Но, неа на сон и излегла Света Петка и и кажала каде и како да се подигне црквата. Затоа и храмот што го изгради нивното семејство го носи името на Св. Петка.

Таа лани се вратила од Виена за цела година да ги води градежните работи за подигнување на црквата што се градела со благослов на митрополитот преспанско-пелагониски и администратор австралиско-новозеландски, господин Петар, кој на 6 август и ќе ја освети, два дена пред големиот верски празник посветен на светата преподобна маченица Параскева, меѓу верниците попозната како света Петка.

Во 1977 година на Трајан му се сонило веднаш да појде во Подмочани и во месноста Лековита Вода да изгради светилиште. Сонот уште утрото и го кажал на Цвета, која му рекла дека во исто време истото го сонила и таа и оти на сон и излегла Св. Петка и јасно и кажала каде и како да се подигне црквата. Трајан веднаш дошол во Подмочани и со татко му Кире и брат му Лазо, како и со неколкумина негови најблиски пријатели, почнале да копаат во Лековита Вода, која одамна е позната во овој крај и која на многумина им помогнала за подобрување на видот, за добивање пород и од други болести. При копањето наишле на големи камења на кои имало стари турски и бугарски монети, кои ги собрале и ги предале во селската црква "Свети великомаченик Ѓорѓи".

Веќе во следната 1978 година, Трајан пак дошол во Подмочани, сонил уште посилен сон што го натерал цврсто и трајно да се завети дека во Лековита Вода ќе изгради црква "Св. Петка".

Некоја голема Божја сила ноќта го кренала Трајан од кревет, велејќи му дека мора веднаш да тргне за да ја изгаси 50-годишната врба што се издига над лековитата вода, и која веќе била во пламен. Трајан рипнал од кревет и тргнал. Бидејќи било ноќ, цело време ја гледал вжарената врба. Кога се приближил на 20 метри до неа, огнот веднаш се повлекол и врбата пак раззеленела. Но, тогаш се создал пат од врбата до манастирот "Св. Илија", кој се наоѓа во соседното село Грнчари и кој потекнува од 13 век. Во тој миг уште еднаш се заветил дека, штом спечали пари, ќе направи убава црква "Св. Петка" на ова свето место. Така, по цели 27 години, лани во мај, со благослов од владиката Петар, почнале да го градат храмот долг 7, широк 5 и висок 7 метри. Трајан, со помош на своите сестри, дал 50.000 евра.