Добредојдовте на МедијаВики за Подмочани
Археолошки локалитети
Археолошки локалитети
Арапски Гробишта. Населба со топилница од доцноантичкото време. Во подножјето на Пелистер, на 2 km североисточно од селото, на простор од неколку декари се среќаваат фрагменти од керамички садови, питоси, градежен материјал и згура од топена железна руда.
Горици. Населба од римското време. Северно од селото, на две височинки што доминираат над околниот терен се среќаваат остатоци од населба, поточно, фрагменти од керамички садови, тегули и грамади од градежен материјал. Локалитетот е познат уште под топонимите Корија и Сто Куќи.
Горно Дрмче. Осамен наод од доцноантичкото време. Во нивата на Ѓорѓи Кромитчиески биле откриени повеќе питоси.
Грнчарско Селиште. Средновековна црква. На 2 km западно од селото, а исто толку и од селото Грнчари, според кажувањето на мештаните, на едниот крај од ливадите, обраснат со капини, имало остатоци од темели на мала црквичка.
Кирејца. Населба од доцноантичкото време. На 1 km од селото, во правецот на селото Рајца, по површината на нивите се забележуваат фрагменти од керамички садови, питоси и множество градежен материјал.
Св. Ѓорѓи. Некропола од римското време. На 500 м југозападно од селото, во правецот на езерскиот брег, според кажувањата на мештаните, при изградбата на црквата Св. Ѓорѓи биле откопани и уништени повеќе гробови со конструкции од камени плочи. Зачувана е надгробна стела со релјефно претставени бисти на маж и жена и коњаник, како и еден мал импост-капител.
