Етнолошки музеј

Етнолошкиот музеј во Подмочани е во сопственост на колекционерот Јоне Ефтимовски. Во неколкуте соби од куќата изложен е дел од збирката која содржи преку над 3000 предмети. Народни носии, накит, монети, оружје и слично го сочинуваат етнолошкото богатство кое оваа фамилија го собирала и грижливо го чува со децении. Во музејот е сместена една од најбогатите етнолошки колекции на балканските простори, која изобилува со илјадници вредни експонати кои претставуваат составен дел од целокупното културно наследство и историја во Македонија. Музејот се наоѓа на главниот пат кој минува низ селото.

Народните носии се она кое ги привлекува странските туристи да дојдат и да се уверат во уникатните рачни изработки. Колекцијата на Јоне Ефтимовски ги содржи, а наедно го отсликува времето од крајот на 19 и почетокот на 20 век. Со тоа се добива една визуелна претстава за некогашното традиционално облекување на македонскиот народ. Колекцијата е претставена преку неколку сегменти од народното облекување, и тоа: комплетни народни носии, кошули и везови, горни облеки, скутини, покривки за глава, чорапи и накит, кои претставуваат вистинска реткост и во музејските витрини, како во нашата држава, така и пошироко.